Microsoft Corporation (NASDAQ: MSFT) ye una empresa multinacional d'orixe estauxunidense, fundada'l 4 d'abril de 1975 por Bill Gates y Paul Allen. Dedicada al sector del software y el hardware, tien la so sede en Redmond, Washington, Estaos Xuníos. Microsoft desenvuelve, fabrica, llicencia y produz software y equipos electrónicos, siendo los sos productos más usaos el sistema operativu Microsoft Windows y la suite Microsoft Office, que tienen una importante posición ente los ordenadores personales. Con una cuota de mercáu cercana al 90.5 % pa Office en 2003 y pa Windows en 2006, siguiendo la estratexa de Bill Gates de «tener una estación de trabayu que funcione col nuesu software en cada escritoriu y en cada llar».[1][2][3][4][5][6][7][8][9]
La compañía tamién suel ser nomada como MS®, poles sos iniciales nel NASDAQ: (NASDAQ: MSFT) o a cencielles como Redmond, por cuenta de la gran influencia que tien sobre la llocalidá del so centru d'operaciones. Tien 93 000 emplegaos en 102 países distintos y cuntó con unos ingresos de 72 360 millones de dólares mientres l'añu 2012[10][11][12][13][14]
Fundada pa desenvolver y vender intérpretes de BASIC pal Altair 8800, a mediaos de la década de 1980 consiguió apoderar el mercáu d'ordenador personales col sistema operativu MS-DOS. La compañía empecipió una Ufierta Pública de Venta nel mercáu de valores en 1986, que, por cuenta de la xubida de cotización de les aiciones, llevó a 4 emplegaos a convertise en multimillonarios y a 12 000 en millonarios.[15]
Mientres la so hestoria, foi oxetu de crítiques, como acusaciones de realizar práutiques monopolísticas que la llevaron ante la Comisión Europea y el Departamentu de Xusticia de los Estaos Xuníos.[16][17] violación de la privacidá de los sos usuarios y collaboración con axencies d'intelixencia en programes de vixilancia global d'altu secretu.
Microsoft afitó la so posición n'otros mercaos como'l de sistemes operativos y suites d'oficina, con recursos como la rede de televisión per cable MSNBC, el portal d'Internet MSN y l'enciclopedia multimedia Microsoft Encarta, productu y serviciu canceláu pola empresa a principios de 2009[18] por cuenta de la competencia de la llibre Wikipedia. La compañía tamién comercializa hardware como'l mure de Microsoft y productos d'entretenimientu caseru como Xbox, Xbox 360, Xbox One, Zune y MSN TV[19] Microsoft dio soporte a los sos usuarios al traviés d'Usenet en grupos de noticies[20] y n'Internet,[21] tamién premia cola categoría de Microsoft MVP (Most Valuable Professional)[22] a aquellos voluntarios que demuestren ser útiles na asistencia a los veceros. La so web oficial ye una de les páxines más visitaes de la rede, recibiendo per día más de 2,4 millones de visites úniques según datos d'Alexa, qu'asitió'l 11 de mayu de 2008 a Microsoft.com como la 14ª páxina web con más visites del mundu.[23]
© MMXXIII Rich X Search. We shall prevail. All rights reserved. Rich X Search